كيس أحلام

ماعدش الحزن يتكايل بزرف دموع
ولا جرّة قلم موجوع
ولا صرخة ألم مُرّة
تشق الحلق
دا القلب يوم مابيتوجع يقوم يضحك
على كل الخلق
وعلى نفسه مابيضحك
*******


عبّى اللى فاضله من الاحلام
ف كيس نايلون
حَمِل وجعه فوق الكارو
وبعلو الصوت
زعّق فى العربجى قدامه
أطلع ياأسطى
لفتة بآهة
سلم على كل جيرانه
واستودع عمره اللى ماجاشِ
بره الحتة 
غصب ان عنه
ماهو أصل الفهم ماهوش ببلاش
لما ف باله بتيجى الذكرى 
قلبه بينغز
رجليه بتغرز
جوه فى ارضه 
وتقوله ارجع 
لو حلمك جوه الكيس محبوس 
غصب ان عنك 
ريحته هتطلع
وان فاحت ريحة الاحلام 
عمره ما ف يوم تقدر تسكت
***********


فى الكيس النايلون 
احلامك تعوى وتتصارع 
مع حتة ذكرى
تسرق بكرة
وتبيعه بكام؟؟
بكام ضحة معجونة آلام
وحزام الغربة يزيد ضغطه
على وسطك
ويدوس على قلبك 
على صوتك 
حتى على دموعك 
ماهو أصل الغربة ف قسوتها
عمرها ماهتدى التأشيرة 
للكيس المليان احلام 

خطوة أخيرة (قصة قصيرة جدا)

عندما جلست فى هذا الموضع قبل نهاية الطريق بساعة أو فقط بخطوة كان حلمى يجلس أمامى ويعطينى ظهره.
كنت أحتاج أن أمد يدى فقط لألمسه.
فى الثانية مابين هذة اللحظة واللحظة التى تليها أخرجت قلبى وفرشته من نكبات الدهر, وبقطعة من المخمل مقطتعة من الليل كنت قد خبأتها موسمين أو ثلاثة نظفته فصار يلمع كالبرق. 
فى لمحة طيبة توارت الشمس فى المشهد الخلفى تاركة ظلّانا متشابكين مع بعضهما.... فألتفت.





تمت